प्रत्येकाच्या घरात चांदीचे दागिने, देवाच्या मूर्ती आणि चांदीची भांडी हमखास असतात. खरेदी करताना झगमगणाऱ्या या वस्तू काही काळानंतर काळवंडतात आणि त्यांची चमक कमी होते. त्यामुळे अनेकजण विविध पद्धती वापरून त्या स्वच्छ करण्याचा प्रयत्न करतात, पण अपेक्षित परिणाम मिळत नाही. जर तुमच्या घरातील चांदीच्या वस्तूही काळ्या पडल्या असतील, तर काही सोप्या घरगुती उपायांनी त्या पुन्हा नव्यासारख्या चमकू शकतात.
तज्ञांच्या मते, हवेत असलेल्या आर्द्रतेमुळे होणाऱ्या रासायनिक अभिक्रियेमुळे चांदी काळी पडते. त्यामुळे चांदीच्या वस्तू कोरड्या आणि हवाबंद ठिकाणी साठवणे महत्त्वाचे आहे. योग्य काळजी घेतल्यास चांदीची चमक दीर्घकाळ टिकवता येते.
चांदी स्वच्छ करण्यासाठी मिठाचे पाणी अत्यंत उपयुक्त ठरते. एका भांड्यात पाणी घेऊन त्यात मीठ मिसळा आणि काळवंडलेल्या वस्तू काही वेळ त्यात ठेवा. नंतर मऊ ब्रशने हलके घासल्यास काळेपणा दूर होतो. त्याचप्रमाणे गरम पाण्यात डिटर्जंट मिसळून त्यात चांदीच्या वस्तू भिजवून ठेवल्यास त्यावरील घाण सहज निघते. नंतर ब्रशने स्वच्छ करून कोरड्या कापडाने पुसल्यास चांगला परिणाम दिसतो.
बेकिंग सोडाही चांदीसाठी प्रभावी आहे. बेकिंग सोड्यात थोडे पाणी घालून पेस्ट तयार करा आणि ती चांदीवर हलक्या हाताने चोळा. त्यानंतर गरम पाण्याने धुतल्यास वस्तू पुन्हा चमकू लागतात. टूथपेस्टदेखील चांगला पर्याय आहे. थोडी पेस्ट लावून ती सुकू द्या आणि नंतर टिश्यूने पुसून स्वच्छ केल्यास चांदीला नवीनसारखी चमक येते.
याशिवाय, उरलेली मेहंदीही उपयोगी पडू शकते. मेहंदीचा लेप चांदीवर लावून 15-20 मिनिटांनी मऊ ब्रश आणि डिटर्जंटने घासल्यास वस्तू स्वच्छ होतात.
या सोप्या उपायांचा वापर करून तुम्ही घरच्या घरीच चांदीच्या वस्तूंना पुन्हा एकदा नव्यासारखी चमक देऊ शकता.